Aliment qarzdorlari uchun chet elga chiqish tartibi o‘zgardi
O‘zbekistonda aliment to‘lovlari bo‘yicha qarzdorlikka ega shaxslar uchun chet elga chiqishni vaqtinchalik cheklamaslik tartibi tasdiqlandi. Bu haqda Zamin.uz xabar berdi.
Ushbu tartib fuqaro maxsus fuqarolik javobgarligi sug‘urtasiga ega bo‘lsa, amalda bo‘ladi. Mazkur o‘zgarishlar Bosh prokuratura, Ichki ishlar vazirligi va Davlat xavfsizlik xizmati tomonidan taklif qilingan.
Yangi tartibga ko‘ra, aliment to‘lash majburiyatiga ega bo‘lgan shaxslar, agar uch oygacha muddatga chet elga chiqishni rejalashtirsa va sug‘urta polisi rasmiylashtirilgan bo‘lsa, ularga nisbatan cheklovlar qo‘llanilmaydi. Ushbu sug‘urta qarzdorning aliment to‘lovlarini bajarmaslik xavfini qoplashga xizmat qiladi.
Sug‘urta polisi mavjudligi haqidagi ma’lumotlar Majburiy ijro byurosi va Ilg‘or loyihalar agentligi axborot tizimlarining integratsiyasi orqali avtomatik tarzda aniqlanadi. Sug‘urta faqat ushbu faoliyat uchun litsenziyaga ega kompaniyalar tomonidan rasmiylashtirilishi mumkin.
Sug‘urta shartlari sug‘urta tashkilotlari va Majburiy ijro byurosi o‘rtasida tuzilgan maxsus kelishuv asosida belgilanadi. Ushbu tartib Adliya vazirligida 3196-2 raqam bilan rasmiy ro‘yxatga kiritilgan.
