O‘zbekiston Respublikasi Tashqi ishlar vazirligi rahbari o‘rinbosari Olim Abdullayev Sharqiy Yevropa va Markaziy Osiyo bo‘yicha Xalqaro migratsiya siyosatini rivojlantirish markazi (ICMPD) mintaqaviy direktori Radim Zak bilan uchrashuv o‘tkazdi. Bu haqda Zamin.uz xabar berdi.
Muloqotning asosiy mavzusi Yevropa Ittifoqi davlatlariga ishlash uchun ketayotgan o‘zbekistonlik fuqarolar uchun viza olish jarayonlarini yengillashtirish va migratsiya sohasidagi hamkorlikni mustahkamlashga qaratildi. Suhbat davomida Yevropa Ittifoqi mamlakatlariga ishlash maqsadida ketayotgan fuqarolar uchun viza talablarini soddalashtirish va tayyorgarlik jarayonlarini osonlashtirish masalalari muhokama qilindi.
Shuningdek, O‘zbekiston fuqarolarining markaz ta’lim dasturlarida faol ishtirokini ta’minlash masalasi ko‘tarildi. ICMPD hukumatlararo hujjatlarni tezkor muvofiqlashtirishga ko‘maklashish, shuningdek, Yevropa mehnat bozori talablariga mos keluvchi qayta o‘qitish dasturlarini kengaytirish imkoniyatlarini o‘rganishga tayyorligini bildirdi.
Uchrashuvning muhim natijalaridan biri O‘zbekistonda ICMPDning doimiy vakolatxonasini tashkil etish bo‘yicha kelishuvga erishilgani bo‘ldi. Bu qaror O‘zbekiston va ICMPD o‘rtasidagi uzoq muddatli hamkorlikni rivojlantirishga bo‘lgan intilishni anglatadi.
Radim Zak uchrashuv davomida Shvetsiyadan qaytayotgan fuqarolarni reabilitatsiya va reintegratsiya qilish mexanizmlarini rivojlantirish bo‘yicha hamkorlikni mustahkamlashga tayyorligini ta’kidladi. Ma’lumot uchun, Xalqaro migratsiya siyosatini rivojlantirish markazi (ICMPD) 1993 yilda tashkil etilgan bo‘lib, bugungi kunda migratsiya sohasida zamonaviy yondashuvlarni ilgari surayotgan yetakchi xalqaro tashkilotlardan biri hisoblanadi.
