O‘zbek-Fransuz universiteti tashkil etilishi rejalashtirilmoqda
O‘zbekistonda yangi oliy ta’lim muassasasi – O‘zbek-Fransuz universiteti tashkil etilishi rejalashtirilmoqda. Bu haqda Zamin.uz xabar berdi.
Ushbu universitet O‘zbekiston Prezidenti Shavkat Mirziyoyevning qaroriga muvofiq ochiladi. Yangi ta’lim maskani O‘zbekiston qonunlari va Fransiya universitetlari konsorsiumi tavsiyalariga asosan faoliyat yuritadi.
Universitet dastlab magistratura yo‘nalishida o‘qitishni boshlaydi. Keyinchalik bakalavriat va doktorantura bosqichlari ham yo‘lga qo‘yiladi.
Talabalar qabul qilinishidan avval maxsus tayyorlov kurslari tashkil etiladi. O‘qish jarayoni davlat granti yoki shartnoma asosida amalga oshiriladi.
Universitet bitiruvchilari ikki diplomga ega bo‘ladilar. Birinchi diplom yangi tashkil etilgan O‘zbek-Fransuz universitetidan, ikkinchisi esa Fransiya universitetlari konsorsiumiga kiruvchi oliy ta’lim muassasasidan beriladi.
Fransuz diplomi O‘zbekistonda rasmiy ravishda tan olinadi. Mazkur loyiha O‘zbekiston va Fransiya o‘rtasidagi ta’lim sohasidagi hamkorlikni yanada mustahkamlaydi.
