Toshkentda qurilishlarda ekologik nazorat kuchaytirildi
Toshkent shahrida atrof-muhitga zarar yetkazuvchi omillarni kamaytirish maqsadida ekologik nazorat ishlari kuchaytirildi. Bu haqda Zamin.uz xabar berdi.
Bu borada keng qamrovli reydlar o‘tkazilmoqda. Ekologiya va iqlim o‘zgarishi milliy qo‘mitasi, Ichki ishlar vazirligi YHXB, Bosh prokuratura, Qurilish va Energetika sohasiga oid inspeksiyalar, Sanitariya-epidemiologiya xizmati hamda boshqa mas’ul idoralar birgalikda ish olib bormoqda.
Mazkur reydlar davomida poytaxtning 12 tumanida joylashgan qurilish obyektlari sinchiklab tekshirildi. Ushbu jarayonda 140 dan ortiq mutaxassis va xodim ishtirok etdi.
Ularning asosiy vazifasi qurilish jarayonida havo, yer va suv manbalariga zarar yetkazuvchi holatlarni aniqlash va ularning oldini olishdan iborat bo‘ldi. Tekshiruv natijalari tashvishli holatlarni ko‘rsatdi.
Jami 96 ta qurilish obyektining 60 tasida chang va qum tarqalishini oldini olishga oid talablar bajarilmaganligi aniqlangan. Shuningdek, 47 ta obyektda ko‘kalamzorlashtirish ishlari talab darajasida olib borilmagan.
Aniqlangan qonunbuzarliklar bo‘yicha tegishli choralar ko‘rildi. Jumladan, 15 ta obyektda qurilish ishlari vaqtincha to‘xtatildi, 70 nafar mas’ul shaxs ma’muriy javobgarlikka tortildi, 68 nafar xodimga esa rasmiy ogohlantirish berildi.
Shu bilan birga, ekologik talablarni joriy etish uchun amaliy ishlar ham bajarildi. Xususan, 24 ta obyektda maxsus suv yuvish moslamalari o‘rnatildi, 62 ta obyektda esa transport vositalari shinalarini yuvish uchun basseynlar tashkil etildi.
Mutasaddilar ta’kidlashicha, bunday reydlar nafaqat qonunbuzarliklarning oldini olishga, balki qurilish sohasidagi ekologik madaniyatni oshirish, atrof-muhitga zarar yetkazuvchi omillarni kamaytirish va sanitariya talablariga rioya etilishini ta’minlashga xizmat qiladi. Hozirgi vaqtda poytaxtda qurilish ishlari jadal olib borilayotgan bir sharoitda bunday nazorat tadbirlari atrof-muhitni himoya qilishda muhim ahamiyat kasb etmoqda.
Manba: Zamin.uz
