Toshkent shahrida ekologik muhitni yaxshilash bo‘yicha olib borilayotgan ishlar dastlabki natijalarini bermoqda. Bu haqda Zamin.uz xabar berdi.
Ekologiya bo‘yicha maxsus komissiya rahbari Aziz Abduhakimovning ma’lum qilishicha, ko‘rilgan muhim choralar natijasida poytaxt havosining sifati biroz yaxshilangan. Uning so‘zlariga ko‘ra, bu borada erishilgan yutuqlar birinchi bosqich bo‘lib, ishlar davom ettiriladi.
Aziz Abduhakimovning ta’kidlashicha, Toshkent shahrida ekologik vaziyatni nazorat qilish va yaxshilash maqsadida 30 ta ishchi guruh tashkil etilgan. Ushbu guruhlarga 300 dan ortiq tajribali mutaxassis jalb etilgan.
24-noyabr kuni Ekologiya milliy qo‘mitasi, Bosh prokuratura, Favqulodda vaziyatlar vazirligi, Milliy gvardiya va Ichki ishlar vazirligi vakillari ishtirokida shahar bo‘ylab reydlar tashkil etilgan. Mazkur chora-tadbirlar poytaxt aholisi salomatligini himoya qilish va atrof-muhitni sog‘lomlashtirishga qaratilgan.
Mutaxassislarning fikriga ko‘ra, bu jarayonni izchil davom ettirish orqali havoning sifatini yanada yaxshilashga erishish mumkin. Manba: One.uz.
