O‘zbekiston Respublikasi Prezidenti Administratsiyasi rahbari Saida Mirziyoyeva Qoraqalpog‘iston Respublikasiga amaliy tashrif bilan bordi. Bu haqda Zamin.uz xabar berdi.
Tashrif davomida u hududda yaqinda faoliyat boshlagan bir qator sanoat korxonalari faoliyati bilan tanishdi. Mirziyoyeva korxonalarda olib borilayotgan ishlanmalar, erishilgan natijalar va istiqboldagi imkoniyatlar haqida o‘z fikr-mulohazalarini bildirdi.
Saida Mirziyoyeva ta’kidlaganidek, Qoraqalpog‘istonda yangi sanoat tarmoqlarini rivojlantirish va zamonaviy ishlab chiqarish jarayonlarini kengaytirish bo‘yicha muhim qadamlar tashlanmoqda. Yangi korxonalar nafaqat mamlakat sanoat salohiyatini yuksaltiradi, balki hudud iqtisodiyotining rivojlanishiga ham jiddiy hissa qo‘shadi.
Tashrif davomida Mirziyoyeva bazaltdan issiqlik saqlovchi mineral plitalar ishlab chiqaruvchi “Karakalpak BasaltWool” MCHJ faoliyati bilan yaqindan tanishdi. U korxona mutaxassislari bilan suhbatlashar ekan, ishlab chiqarishda mahalliy xomashyo va materiallardan foydalanish darajasining 80 foizga yetgani e’tiborga molik ekanini qayd etdi.
Bu kabi loyihalar hududda eksport salohiyatini oshirish, yangi ish o‘rinlarini yaratish va aholi bandligini ta’minlashda muhim ahamiyatga ega. Saida Mirziyoyeva Qoraqalpog‘istonda amalga oshirilayotgan ushbu yirik loyihalar nafaqat hudud, balki butun O‘zbekiston sanoati uchun strategik ahamiyatga ega ekanini ta’kidladi.
U bunday tashabbuslar mamlakatning iqtisodiy barqarorligi va ijtimoiy rivojlanishiga ijobiy ta’sir ko‘rsatishiga ishonch bildirdi. Manba: zamin.uz
