O‘zbekistonda ekologik loyihalarga 6,1 mln dollar ajratildi
Global Ekologik Fond (GEF) tomonidan O‘zbekistonda ekologiya sohasidagi loyihalarni amalga oshirish uchun 6,1 million AQSh dollari miqdorida mablag‘ ajratildi. Bu haqda Zamin.uz xabar berdi.
Bu haqda Kursiv Uzbekistan nashri xabar berdi. Ushbu mablag‘ GEF-8 dasturi doirasida tashkil etilgan "O‘zbekistonda qimmatbaho landshaftlarni kompleks boshqarish va tiklash" (EcoLand) loyihasini moliyalashtirishga yo‘naltiriladi.
Mazkur loyiha CITES konferensiyasi davomida rasmiy ishga tushirildi. Loyihaning asosiy maqsadi O‘zbekistonning uchta asosiy landshaft hududlarida ekotizimlarni tiklash va muhofaza qilishga qaratilgan kompleks yondashuvlarni kengaytirishdir.
Ushbu jarayon doirasida yer resurslarini barqaror boshqarish, tabiiy boyliklarni saqlash, iqlim o‘zgarishining salbiy oqibatlarini kamaytirish va mahalliy aholi ishtirokini ta’minlash masalalari birlashtiriladi. Milliy ekologiya qo‘mitasi rais o‘rinbosari Jusipbek Kazbekovning so‘zlariga ko‘ra, ushbu loyiha O‘zbekistonning ekologik islohotlarida muhim qadam hisoblanadi.
Loyiha olti viloyat va o‘nta tajriba hududini qamrab oladi. Umumiy hisobda 1,3 million gektar maydonda tabiiy zonalarni boshqarish samaradorligi oshiriladi, shuningdek, mahalliy aholining ekologik manfaatlardan teng foydalanishi uchun mexanizmlar yaratiladi.
EcoLand loyihasi uch turdagi ekotizimlar bilan ishlaydi va boshqaruvning zamonaviy mexanizmlarini joriy etishni ko‘zda tutadi. Shuningdek, biologik xilma-xillikni moliyalashtirish mexanizmlari sinovdan o‘tkaziladi.
Loyiha doirasida "yashil" investitsion mahsulotlar va biologik xilma-xillik kreditlari ham amaliyotga tatbiq etiladi. Ayollar, yoshlar va zaif ijtimoiy guruhlarni qaror qabul qilish jarayonlariga jalb etishga alohida e’tibor qaratiladi.
Tadbir davomida Milliy ekologiya qo‘mitasi va BMT Taraqqiyot dasturi o‘rtasida EcoLand loyihasini birgalikda amalga oshirish bo‘yicha kelishuv imzolandi. Ushbu loyiha doirasida degradatsiyaga uchragan hududlarni tiklash, biologik xilma-xillikni muhofaza qilish, suv va yer resurslarini barqaror boshqarishni rivojlantirishga alohida e’tibor qaratiladi.
BMT Taraqqiyot dasturi tomonidan tabiatga yo‘naltirilgan turizmni rivojlantirish va mahalliy jamoalarni qo‘llab-quvvatlash bo‘yicha qator mexanizmlar taqdim etildi.
