O‘zbekistonda 27–28-noyabr kunlari magnit bo‘ronlari kutilmoqda

O‘zbekistonda yaqin kunlarda geomagnit faollikning sezilarli darajada oshishi kutilmoqda. Bu haqda Zamin.uz xabar berdi.

"Meteonova" ma’lumotlariga ko‘ra, 27 va 28-noyabr kunlari mamlakat hududida kuchli magnit bo‘ronlari kuzatiladi. Bu bo‘ronlar "to‘q sariq" xavf darajasi bilan baholanmoqda.

Magnit bo‘ronlari 27-noyabr kuni ertalab soat 05:00 dan kechki 17:00 gacha davom etishi, intensivligi esa 4 magnitudagacha yetishi prognoz qilinmoqda. Keyinroq kuchi biroz pasayib, 3 magnitudaga tushishi, ammo 28-noyabr kuni yana 4 magnitudaga chiqishi kutilmoqda.

Mutaxassislarning ta’kidlashicha, bunday geomagnit faollik yurak-qon tomir kasalliklari, asab tizimi xastaliklari, diabet va bronxial astma bilan og‘rigan insonlar hamda ob-havoga sezgir kishilarga salbiy ta’sir ko‘rsatishi mumkin. Ular holsizlik, bosh og‘rig‘i va qon bosimi o‘zgarishidan shikoyat qilishlari ehtimoli bor.

Shifokorlar bunday kunlarda ortiqcha jismoniy va ruhiy zo‘riqishlardan saqlanishni, ko‘proq suv ichishni hamda dam olishga alohida e’tibor qaratishni tavsiya etmoqda.