Ekologik huquqbuzarlikni fosh eting, mukofot oling
Ekologik huquqbuzarliklarni aniqlagan fuqarolar endilikda moliyaviy mukofotga ega bo‘lishlari mumkin. Bu haqda Zamin.uz xabar berdi.
Ekologiya va iqlim o‘zgarishi milliy qo‘mitasi tomonidan “Ekonazorat” tizimi hamda “@ecogovuzbot” orqali yuborilgan murojaatlar asosida jarima miqdorining 15 foizi huquqbuzarlikni fosh etgan shaxsga mukofot sifatida beriladi. Bu tizim fuqarolarni ekologik masalalarda faol ishtirok etishga undash maqsadida joriy etilgan.
Mazkur yangilik haqida qo‘mita raisi va Maxsus komissiya rahbari Aziz Abduhakimov ma’lumot berdi. U o‘z chiqishida fuqarolarning ekologik muammolarni hal qilishdagi faol ishtirokini ta’kidlab, har bir fuqaroning kamerasi ekologik himoya vositasiga aylanishi kerakligini qayd etdi.
“Huquqbuzarlikni aniqlang va mukofotingizni oling. Toza havo va sog‘lom hayot uchun birgalikda harakat qilishimiz kerak,” – dedi Abduhakimov.
Yangi tizim fuqarolarni atrof-muhitga nisbatan mas’uliyatli bo‘lishga undashi va ekologik muammolarga e’tiborli bo‘lishga rag‘batlantirishi kutilmoqda. Bu orqali jamiyatda ekologik ongni oshirish va muhitni muhofaza qilishga ko‘maklashish maqsad qilingan.
