Bojxona to‘lovlariga yangi tartib joriy etildi
O‘zbekiston Bojxona kodeksiga o‘zgartirishlar kiritildi. Bu haqda Zamin.uz xabar berdi.
Ushbu o‘zgartirishlarga ko‘ra, endilikda mahsulotlar eng qulay sharoitli davlatlarda ishlab chiqarilgan bo‘lsa, ular uchun bojxona to‘lovlari belgilangan tariflar asosida undiriladi. Bu jarayon mahsulotning qayerdan yuborilganidan qat’i nazar amalga oshiriladi.
Agar mahsulot noma’lum ishlab chiqaruvchidan yoki O‘zbekiston eng qulay sharoitlar taqdim etmagan davlatlardan olib kelingan bo‘lsa, ularga qo‘shimcha bojxona to‘lovlari qo‘llaniladi. Bunda qo‘shimcha to‘lovlar mahsulotning bojxona stavkasi miqdoriga qarab belgilanadi.
Masalan, advalor stavkasi 10%gacha bo‘lgan mahsulotlar uchun 5%, 10%dan 20%gacha bo‘lgan mahsulotlar uchun 10%, 20%dan 30%gacha bo‘lgan mahsulotlar uchun 15%, 30% va undan yuqori bo‘lgan mahsulotlar uchun esa 20% qo‘shimcha to‘lov joriy etiladi. Mazkur qonun rasmiy e’lon qilinganidan uch oy o‘tib kuchga kiradi.
Bu o‘zgarishlar mamlakat iqtisodiyotini himoya qilish va mahalliy ishlab chiqaruvchilar uchun qulay sharoit yaratishni ko‘zda tutadi. Manba: zamin.uz
