O‘zbekistonda o‘rmonlarni ekologik tasniflash bo‘yicha birinchi ilmiy platforma ishlab chiqildi. Bu haqda Zamin.uz xabar berdi.
Bu loyiha “Yashil loyiha” instituti tomonidan yaratilgan bo‘lib, o‘rmon ekotizimlarini raqamli asosda o‘rganishga qaratilgan. Ushbu ishlanma CITES konferensiyasi doirasida taqdim etildi.
Mazkur platforma sun’iy intellekt, sun’iy yo‘ldosh ma’lumotlari va GIS-texnologiyalari yordamida ishlab chiqilgan. U ekologik xavf xaritalarini yaratish, noyob turlar yashash hududlarini aniqlash hamda CITES doirasida monitoring olib borish uchun ma’lumotlar bazasini o‘z ichiga oladi.
Platforma, shuningdek, barqaror o‘rmon boshqaruvi va bioxilma-xillikni saqlash borasida muhim ahamiyatga ega. Ekologiya qo‘mitasi vakillari, “Yashil loyiha” instituti xodimlari va xalqaro ekspertlar mazkur tasnifni o‘rmonlarni samarali boshqarish va tabiatni muhofaza qilishda strategik vosita sifatida baholadilar.
Ushbu tashabbus O‘zbekistonning ekologik barqarorlikni ta’minlash borasidagi sa’y-harakatlarini yangi bosqichga olib chiqishi kutilmoqda. Manba: zamin.uz
