O‘zbekiston suv va yer resurslarini boshqarishni modernizatsiya qilmoqda
O‘zbekiston umumiy qiymati 18 million dollardan oshadigan CAWLN dasturining to‘rtta tashabbusida ishtirok etmoqda. Bu haqda Zamin.uz xabar berdi.
Mazkur tashabbuslar asosan suv va yer resurslarini samarali boshqarishga qaratilgan. 5,84 million dollarlik loyiha Amudaryo, Zarafshon va Pyanj daryolari havzalarida suv resurslarini boshqarishni modernizatsiya qilishni ko‘zda tutadi.
Sirdaryo va Naryn daryolari havzalarida suv taqsimoti samaradorligini oshirish uchun esa yana 5 million dollar ajratilishi rejalashtirilgan. Shuningdek, 5,6 million dollarlik boshqa loyiha tuproq degradatsiyasiga qarshi kurashish, yerlarni tiklash va agroekologik amaliyotlarni rivojlantirishga yo‘naltirilgan.
Bundan tashqari, 2 million dollarlik mintaqaviy tashabbus cho‘llanish jarayonlariga qarshi kurashish va yerlarni monitoring qilish tizimini kuchaytirishni o‘z ichiga oladi. CAWLN dasturi mintaqa davlatlarini ekologik barqarorlikni ta’minlash va iqlim o‘zgarishlariga moslashish bo‘yicha birlashtiradi.
Bu tashabbuslar O‘zbekiston va qo‘shni davlatlarning ekologik muammolarni hal qilishdagi hamkorligini yanada mustahkamlaydi. Manba: zamin.uz
