Elektron sigaretalar savdosiga qat’iy taqiq joriy etildi
O‘zbekiston Respublikasida 2025-yil 27-noyabrda qabul qilingan yangi qonun (O‘RQ–1098) asosida bir qator huquqiy hujjatlarga muhim o‘zgartish va qo‘shimchalar kiritildi. Bu haqda Zamin.uz xabar berdi.
Ushbu o‘zgarishlarning asosiy maqsadi elektron sigaretalar va nikotinli tamaki mahsulotlarining noqonuniy aylanmasini oldini olishdir. Xususan, Jinoyat kodeksiga yangi modda kiritilib, mamlakat hududida muomalasi taqiqlangan elektron sigaretalar, veyplar, nikotinli suyuqliklar va boshqa qurilmalarni ishlab chiqarish, sotish, saqlash, tashish, olib kirish yoki olib chiqish bo‘yicha javobgarlik keskin kuchaytirildi.
Agar ushbu harakatlar “ancha miqdor”da amalga oshirilsa yoki ilgari ma’muriy jazo qo‘llangandan so‘ng takrorlansa, quyidagi jazolar belgilandi: — Bazaviy hisoblash miqdorining 300 baravaridan 500 baravarigacha jarima; — 2 yildan 3 yilgacha axloq tuzatish ishlari; — 3 yildan 5 yilgacha ozodlikni cheklash; — 3 yildan 5 yilgacha ozodlikdan mahrum qilish. Shuningdek, qonunda motivatsion norma ham joriy etilgan.
Agar qoidabuzar o‘z qilmishini tan olsa, huquqni muhofaza qiluvchi organlarga ixtiyoriy ravishda murojaat qilsa va taqiqlangan mahsulotlarni topshirsa, u jinoiy javobgarlikdan ozod qilinadi. Ushbu chora noqonuniy bozor ishtirokchilarini qonuniy faoliyatga qaytishga rag‘batlantirish maqsadida kiritilgan.
“Alkogol va tamaki mahsulotlarining tarqatilishini hamda iste’mol qilinishini cheklash to‘g‘risida”gi qonunga ham o‘zgartish kiritilib, elektron sigaretalar va ular uchun mo‘ljallangan suyuqliklarning aylanmasi qat’iy taqiqlandi. Mazkur o‘zgarishlarning asosiy maqsadi yoshlar salomatligini himoya qilish, zararli odatlarning tarqalishini oldini olish hamda noqonuniy bozorni qisqartirishdir.
Mutaxassislar bu choralarning kelajak avlod sog‘lig‘ini saqlashda muhim ahamiyatga ega ekanini ta’kidlashmoqda.
