O‘zbekistonda elektron sigaretalar to‘liq taqiqlandi
O‘zbekistonda elektron sigaretalar bo‘yicha qonunchilik keskin kuchaytirildi. Bu haqda Zamin.uz xabar berdi.
2025-yil 27-noyabr kuni qabul qilingan yangi qonunga ko‘ra, endilikda elektron sigaretalarni ishlab chiqarish, saqlash, tashish yoki sotish qonunbuzarlik hisoblanib, jiddiy javobgarlikka sabab bo‘ladi. Qonunga kiritilgan o‘zgartirishlarga ko‘ra, mamlakat hududida taqiqlangan tamaki mahsulotlari va nikotin yetkazib beruvchi elektron qurilmalarni ishlab chiqarish yoki olib kirish katta miqdorda amalga oshirilsa, quyidagi jazolar belgilanadi: 123,6 million so‘mdan 206 million so‘mgacha jarima, 2-3 yil axloq tuzatish ishlari, 3-5 yil ozodlikni cheklash yoki 3-5 yilga ozodlikdan mahrum qilish.
Shu bilan birga, qonunda shunday band bor: agar shaxs taqiqlangan mahsulotlarni ixtiyoriy ravishda topshirib, aybini tan olsa, u javobgarlikdan ozod qilinadi. Bu norma qonuniylikni ta’minlash va noqonuniy faoliyatni kamaytirishga qaratilgan.
Bundan tashqari, “Alkogol va tamaki mahsulotlarini cheklash to‘g‘risida”gi qonunga ham o‘zgartirishlar kiritilib, elektron sigaretalar va ularning tarkibidagi suyuqliklarni mamlakatda muomalaga chiqarish to‘liq taqiqlandi. Yangi tartibning asosiy maqsadi yoshlar salomatligini himoya qilish va nikotin mahsulotlarining tarqalishini cheklashga qaratilgan.
Bu o‘z navbatida sog‘lom turmush tarzini shakllantirishga xizmat qiladi. Ma’lumot manbasi: Zamin.uz
