O‘zbekistonda yagona QR-kod tizimi joriy etiladi
O‘zbekistonda moliyaviy texnologiyalarni rivojlantirish doirasida QR-kod orqali to‘lovlarni amalga oshirish uchun yagona standartlarni joriy etish rejalashtirilmoqda. Bu haqda Zamin.uz xabar berdi.
Bu dastur 2026-yilgacha amalga oshirilishi ko‘zda tutilgan. Markaziy bankka moliyaviy tashkilotlar bilan hamkorlikda universal QR-kod loyihasini sinov tariqasida ishga tushirish vazifasi yuklatilgan bo‘lib, bu jarayon joriy yil oxirigacha amalga oshirilishi kutilmoqda.
Kelgusi yil boshida esa ushbu texnologiyaga oid hujjatlarni ishlab chiqish va tasdiqlash ishlari rejalashtirilgan. Yagona QR-kod tizimi 2024-yil fevral oyidan boshlab to‘liq ishga tushirilishi mo‘ljallangan.
Ushbu yangilik mamlakatda to‘lov tizimlarini yanada qulay va xavfsiz qilishga xizmat qiladi. Bundan tashqari, 2024-yil sentabr oyidan boshlab O‘zbekistonda ochiq bank tizimi faoliyatini boshlashi kutilmoqda.
Bu platforma banklar, to‘lov tashkilotlari va moliyaviy texnologiyalar bilan bog‘liq kompaniyalarga ma’lumotlarni xavfsiz almashish imkoniyatini beradi. Ushbu tizim moliyaviy xizmatlarning sifatini oshirish va mijozlar uchun qulaylik yaratishni maqsad qilgan.
Manba: zamin.uz
