O‘zbekistonda fintex rivoji uchun 1 milliard dollar investitsiya jalb qilinadi.
O‘zbekiston Prezidenti Shavkat Mirziyoyev mamlakatda moliyaviy texnologiyalar (fintex) sohasini rivojlantirish bo‘yicha muhim qaror qabul qildi. Bu haqda Zamin.uz xabar berdi.
Ushbu qarorga asosan, fintex yo‘nalishida faoliyat olib boruvchi startaplar uchun 1 milliard AQSh dollari miqdorida xorijiy investitsiyalarni jalb qilish rejalashtirilgan. Shuningdek, Markaziy bank qoshida ustav kapitali 50 million dollar bo‘lgan venchur fond va innovatsion markaz tashkil etiladi.
Bu markaz fintex sohasidagi loyihalarni qo‘llab-quvvatlash va rivojlantirishga xizmat qiladi. Rejaga ko‘ra, mamlakatda fintex kompaniyalari soni 200 taga yetkazilishi maqsad qilingan.
2026-yilning 1-yanvaridan boshlab, markaz ishtirokchilarining fintex yo‘nalishida ta’lim olish xarajatlari 50 foizgacha qoplanadi, lekin bu miqdor 20 ming dollardan oshmasligi belgilangan. Bundan tashqari, Markaziy bank har yili moliyaviy texnologiyalar bo‘yicha yirik xalqaro forumlar tashkil etishni rejalashtirgan.
Ushbu tadbirlar muntazam ravishda o‘tkazilib, sohaning xalqaro miqyosdagi taraqqiyotiga hissa qo‘shadi.
