Yoshlarni giyohvandlikdan asrash bo‘yicha yangi choralar.

Prezident Administratsiyasida kuch tuzilmalar rahbarlari ishtirokida muhim yig‘ilish bo‘lib o‘tdi. Bu haqda Zamin.uz xabar berdi.

Unda narkojinoyatchilik, jinoiy guruhlarning faoliyati va noqonuniy qurol-aylanmasiga qarshi kurashish masalalari muhokama qilindi. Yig‘ilishda Saida Mirziyoyeva so‘zga chiqib, ayniqsa yoshlar orasida giyohvandlikning oldini olish masalasi ustuvor ahamiyatga ega ekanini ta’kidladi.

U giyohvand moddalar bilan bog‘liq jinoyatlarga qarshi samarali va tezkor tizim yaratish zarurligini qayd etdi. Shuningdek, ushbu tizimni muvofiqlashtirish va uni amaliyotga joriy etish uchun barcha kuchlarni safarbar qilish lozimligini ta’kidladi.

“Yoshlarimizni giyohvandlik balosidan asrash – davlatimizning eng muhim vazifalaridan biridir. Bu yo‘lda har qanday noqonuniy harakatlarga qat’iy chek qo‘yiladi,” dedi Saida Mirziyoyeva.

Yig‘ilish yakunida kuch tuzilmalari, huquqni muhofaza qiluvchi idoralar va mutasaddi tashkilotlarga tegishli topshiriqlar berildi. Ushbu masalada davlat siyosatida katta o‘zgarishlar va yangi yondashuvlar kutilmoqda.

Manba: Zamin.uz.