Giyohvandlikka qarshi kurashda yangi bosqich boshlandi

Prezident Administratsiyasi rahbari Saida Mirziyoyeva mamlakat kuch tuzilmalari rahbarlari bilan o‘tkazilgan ishchi yig‘ilishda giyohvand moddalar savdosi va unga aloqador jinoyatlarga qarshi kurashish bo‘yicha yangi bosqich boshlanganini e’lon qildi. Bu haqda Zamin.uz xabar berdi.

Yig‘ilish davomida mavjud tahdidlar tahlil qilinib, muammoni bartaraf etish uchun tezkor hamkorlik mexanizmlarini mustahkamlash zarurligi qayd etildi. So‘nggi yillarda giyohvand moddalar savdosi, jinoiy guruhlar faoliyati va noqonuniy qurol-aslaha muomalasi jiddiy xavotir uyg‘otayotgan muammolardan biriga aylangan.

Saida Mirziyoyeva mas’ul rahbarlardan bu sohada aniq natijalarga erishish uchun samarali va ishonchli tizimni shakllantirishni talab qildi. Yig‘ilishda narkojinoyatchilikka qarshi kurashish uchun muvofiqlashtirilgan va tezkor ishlaydigan yagona mexanizmni qisqa muddatda tashkil etish vazifasi belgilandi.

Shuningdek, huquqni muhofaza qilish organlari o‘rtasida ma’lumot almashish, operatsiyalarni muvofiqlashtirish va profilaktika tadbirlarini kuchaytirish zarurligi ta’kidlandi. Saida Mirziyoyeva so‘zlariga ko‘ra, davlatning jinoyatchilikka qarshi siyosati murosasiz yondashuvni o‘z ichiga oladi.

Yangi chora-tadbirlar aholi xavfsizligini ta’minlash va milliy manfaatlarni himoya qilishda muhim ahamiyat kasb etadi. Manba: One.uz