O‘zbekistonda ilk mahalliy tezyurar poyezdlar ishlab chiqariladi
O‘zbekiston yaqin kelajakda o‘zining ilk mahalliy tezyurar poyezdlarini ishlab chiqarishni boshlashi rejalashtirilmoqda. Bu haqda Zamin.uz xabar berdi.
Bu haqda “O‘zbekiston temir yo‘llari” aksiyadorlik jamiyati raisining birinchi o‘rinbosari Hikmatulla Rahmatov ma’lum qildi. U 27-noyabr kuni Toshkentda bo‘lib o‘tgan Transkaspiy yo‘lagi va o‘zaro bog‘liqlik bo‘yicha xalqaro forumda jurnalistlar bilan suhbatda bu boradagi rejalar bilan o‘rtoqlashdi.
Rahmatovning so‘zlariga ko‘ra, xorijiy kompaniyalar bilan hamkorlikda mahalliy zavodda tezyurar poyezdlar ishlab chiqarish bo‘yicha muzokaralar deyarli yakuniga yetgan. Qaror yaqin kunlarda qabul qilinishi kutilmoqda.
Dastlabki rejaga ko‘ra, poyezdlar ishlab chiqarish 2027-yilda boshlanadi. Bu poyezdlar dunyoning ilg‘or davlatlaridan birining kompaniyasi bilan hamkorlikda O‘zbekistonda ishlab chiqariladi.
Mahalliy ishlab chiqarishning asosiy afzalliklari sifatida Rahmatov yangi poyezdlarning import mahsulotlarga nisbatan ancha arzon bo‘lishini ta’kidladi. Bunga mahalliy mutaxassislarning malakasi, texnologiyalarni o‘zlashtirish imkoniyati va soliq tushumlarining mamlakat ichida qolishi kabi omillar sabab bo‘ladi.
Rahmatovning fikricha, bu jarayon mahalliy kadrlarning bilim va tajribasini oshirishga, innovatsion yondashuvlarni rivojlantirishga xizmat qiladi. Shuningdek, yangi tezyurar poyezdlar nafaqat O‘zbekiston ichida, balki Markaziy Osiyo, Kavkaz va MDH mamlakatlariga ham eksport qilinishi rejalashtirilmoqda.
Bu mahsulotlar xalqaro standartlarga to‘liq javob beradi. Rahmatovning ta’kidlashicha, O‘zbekistonda ishlab chiqariladigan tezyurar poyezdlar MDH davlatlari orasida faqat Rossiyada mavjud bo‘lgan poyezdlardan ham zamonaviyroq bo‘ladi.
Shu bilan birga, ularning narxi chet eldan xarid qilinadigan poyezdlarga qaraganda 10–15 foiz arzonroq bo‘lishi kutilmoqda. Mahalliy ishlab chiqarish nafaqat iqtisodiy samara keltiradi, balki yangi ish o‘rinlari yaratish, eksportni rivojlantirish va valyuta tushumlarini oshirish kabi ijobiy natijalarga ham olib keladi.
Dastlabki bosqichda yillik 10 ta tezyurar poyezd ishlab chiqarish rejalashtirilmoqda. Ma’lumot manbasi: One.uz.
