Dam olish kunlari havo biroz soviydi
O‘zbekistonda dam olish kunlari havo harorati biroz pasayishi kutilmoqda. Bu haqda Zamin.uz xabar berdi.
“O‘zgidromet” xabariga ko‘ra, harorat o‘rtacha 2–3 darajaga tushadi. Mamlakatning ko‘plab hududlarida kechasi harorat 2 daraja sovuqdan 3 daraja iliqqacha, kunduzi esa 10–15 daraja iliq bo‘lishi prognoz qilinmoqda.
Shimoliy hududlarda esa kechasi harorat 0–5 daraja sovuq, kunduzi esa 5–10 daraja iliq bo‘lishi mumkin. Ayrim hududlarda qalin tuman kuzatilishi ehtimoli bor, ammo yog‘ingarchilik deyarli kutilmayapti.
Toshkent shahrida ham dam olish kunlari yog‘ingarchilik kuzatilmaydi. Poytaxtda kechasi harorat 0–3 daraja iliq, kunduzi esa 11–14 daraja iliq bo‘lishi tahmin qilinmoqda.
Mutaxassislarning ma’lumotlariga ko‘ra, O‘zbekiston hududiga kirgan sovuq antitsiklon ta’siri 5-dekabrgacha davom etishi mumkin. Shu davrda inversiya hodisalari kuchayib, havoda chang, tutun va mayda zarrachalar miqdori ortishi mumkin.
Bundan tashqari, quyuq tumanlar kuzatilishi ehtimoli ham mavjud. Manba: O‘zgidromet ma’lumotlari.
