O‘zbekistonda moliyaviy erkinlikni oshirish choralari belgilandi
O‘zbekistonda fuqarolarning moliyaviy erkinligini oshirish va yangi texnologiyalarni joriy etish maqsadida muhim chora-tadbirlar rejalashtirilmoqda. Bu haqda Zamin.uz xabar berdi.
Ushbu o‘zgarishlar Prezident Shavkat Mirziyoyev tomonidan 2023 yil 27 noyabrda tasdiqlangan moliyaviy texnologiyalarni rivojlantirish bo‘yicha "yo‘l xaritasi"da belgilangan. Hujjatga ko‘ra, 2025 yilning dekabr oyigacha Markaziy bank fuqarolarga o‘z maoshlarini olish uchun istalgan bank yoki to‘lov tizimini tanlash imkoniyatini taqdim etuvchi mexanizmni ishlab chiqadi.
Bu yangilik xodimlarga o‘z tanloviga ko‘ra moliyaviy xizmatlardan foydalanish imkonini beradi va banklar o‘rtasidagi raqobatni oshiradi. Shuningdek, 2026 yilning iyun oyigacha ommaviy parallel to‘lov tizimi joriy qilinadi.
Bu tizim ish beruvchilarga bir vaqtning o‘zida bir nechta bankka maosh o‘tkazish imkoniyatini yaratadi. Natijada, xodimlar biror bir moliyaviy muassasaga bog‘lanib qolmasdan, o‘zlari uchun qulay tizimdan foydalanish imkoniga ega bo‘ladilar.
Bundan tashqari, 2026 yilning fevral oyida tezkor to‘lovlar tizimi orqali telefon raqami yordamida shaxsdan shaxsga (P2P) pul o‘tkazmalarini amalga oshirish yo‘lga qo‘yiladi. Shu bilan birga, Open API texnologiyasi orqali mablag‘larni istalgan ilova yordamida o‘tkazish imkoniyati ham yaratiladi.
Bu yangiliklar fuqarolar uchun moliyaviy xizmatlardan foydalanishni yanada qulay va erkin qiladi.
