Qashqadaryoda sun’iy qon aylanish apparati ishga tushdi
Qashqadaryo viloyatida tibbiyot sohasida muhim yangilik ro‘y berdi. Bu haqda Zamin.uz xabar berdi.
Braziliyadan umumiy qiymati 1,96 milliard so‘m bo‘lgan sun’iy qon aylanish apparati (AIK) Respublika shoshilinch tibbiy yordam markazining Qashqadaryo filialiga o‘rnatildi va foydalanishga topshirildi. Ushbu uskuna hududda yuqori texnologiyali tibbiy xizmatni rivojlantirish yo‘lida muhim qadam hisoblanadi.
Mazkur apparat qon-tomir jarrohlik amaliyotlarini yuqori standartlarda bajarish, og‘ir ahvoldagi bemorlarni zudlik bilan reanimatsiya qilish va tibbiy yordam sifatini oshirish imkonini beradi. Shuningdek, bu uskuna maxsus jarrohlik muolajalarida bemorning hayotiy funksiyalarini barqaror ushlab turishda muhim ahamiyatga ega.
AIK apparatini xarid qilish jarayoni “Tashabbusli byudjet” loyihasining 2024-yil 2-mavsumi doirasida amalga oshirildi. Ushbu maqsad uchun dastlab 1 milliard 360 million so‘m mablag‘ ajratilgan bo‘lsa, viloyat hokimligi yordamida 2025-yil mahalliy byudjetining erkin qoldiqlaridan qo‘shimcha 600 million so‘m yo‘naltirilib, zarur mablag‘ to‘liq shakllantirildi.
Tibbiyot xodimlarining fikriga ko‘ra, yangi uskuna yurak-qon tomir kasalliklari bilan og‘rigan bemorlarga zamonaviy va samarali muolajalar o‘tkazish imkoniyatini kengaytiradi. Bu esa o‘lim holatlari sonini kamaytirishda muhim omil bo‘lishi kutilmoqda.
Mazkur o‘zgarish Qashqadaryo viloyatida tibbiy xizmat sifatini oshirish hamda aholi salomatligi uchun qo‘shimcha kafolat yaratish yo‘lida yana bir qadam bo‘ldi. Zamonaviy texnologiyalarning joriy etilishi hududda tibbiyot sohasini yangi bosqichga olib chiqmoqda.
Ma’lumot manbasi: zamin.uz.
