Soliq intizomida ilg‘or mahallalarga 2 mlrd so‘m mukofot
2026-yildan boshlab O‘zbekistonda soliq to‘lovlarda namuna bo‘lgan 100 ta mahallaga davlat tomonidan qo‘shimcha moliyaviy rag‘bat beriladi. Bu haqda Zamin.uz xabar berdi.
Har bir “Eng yaxshi soliq to‘lovchi mahalla” davlat byudjeti hisobidan har yili 2 milliard so‘m miqdorida mablag‘ oladi. Ushbu tashabbusning asosiy maqsadi mahallalarda soliq intizomini mustahkamlash va faol fuqarolarni qo‘llab-quvvatlashdan iborat.
Loyiha doirasida ikki yil ketma-ket g‘olib bo‘lgan mahallalar keyingi yillarda loyiha kiritishda cheklovlardan ozod qilinadi. Bundan tashqari, agar loyiha qiymatining 25 foizi aholi tomonidan qoplangan bo‘lsa, qolgan 75 foizini davlat moliyalashtiradi.
Bu esa aholining moliyaviy ishtirokini rag‘batlantirishga xizmat qiladi. Saralangan 100 ta mahalla ajratilgan mablag‘ni “Mahalla ijtimoiy-iqtisodiy muammolarini hal etish jamg‘armasi” orqali oladi.
Ushbu mablag‘lar asosan mahallalarning infratuzilmasini rivojlantirish, obodonlashtirish va aholiga qulay sharoitlar yaratish kabi ishlarga yo‘naltiriladi. Bu tashabbus mahallalarda yashovchi fuqarolarning turmush darajasini oshirishga xizmat qiladi.
