O‘zbekiston davlat qarzi 44 milliard dollarga yetdi
O‘zbekiston davlat qarzi yil sayin oshib bormoqda. Bu haqda Zamin.uz xabar berdi.
2025-yil 1-oktyabr holatiga ko‘ra, mamlakatning umumiy qarzi 44 milliard dollarni tashkil etdi. Bu ko‘rsatkich o‘tgan yilga nisbatan 4,9 milliard dollarga oshgan.
Davlat qarzining yalpi ichki mahsulotdagi (YAIM) ulushi 32,3 foizga teng bo‘lib, aholi jon boshiga qarz miqdori 1154 dollarni tashkil qilmoqda. Umumiy qarzning 36,7 milliard dollari tashqi qarz, 7,2 milliard dollari esa ichki qarz hisoblanadi.
Tashqi qarzning 47 foizi davlat byudjetini qo‘llab-quvvatlash uchun, 16 foizi energetika sohasiga, qolgan qismi esa qishloq xo‘jaligi, transport va uy-joy-kommunal sohalarga yo‘naltirilgan. O‘zbekistonning asosiy kreditorlari Jahon banki (8 milliard dollar) va Osiyo taraqqiyot banki (7,5 milliard dollar) hisoblanadi.
Tashqi qarzning 63 foizi AQSh dollarida, 12 foizi milliy valyuta so‘mda, 8 foizi esa yevroda shakllantirilgan. Mutaxassislarning fikricha, iqtisodiy o‘sish va infratuzilma loyihalariga bo‘lgan ehtiyoj tashqi mablag‘larni jalb qilishni kuchaytirmoqda.
Shu bilan birga, davlat kafolatisiz olingan, ammo davlatga tegishli korxona va banklar zimmasiga tushadigan “kvazi-davlat” qarzlari ham ortib bormoqda. 2025-yilning birinchi yarmida O‘zbekistonning umumiy tashqi qarzi, ya’ni davlat va xususiy sektor qarzlarining jami, 72,2 milliard dollarni tashkil etgani qayd etilgan.
Manba: Zamin.uz
