Alyona Aitova Island Peak cho‘qqisini zabt etdi
O‘zbekistonlik alpinist Alyona Aitova Hindiston va Nepal chegarasida joylashgan Himolay tog‘laridagi Island Peak (Imja Tse) cho‘qqisiga muvaffaqiyatli ko‘tarildi. Bu haqda Zamin.uz xabar berdi.
U 6189 metr balandlikdagi ushbu cho‘qqiga chiqib, tarixda bu balandlikni zabt etgan birinchi o‘zbekistonlik ayol sifatida qayd etildi. Mutaxassislarning fikriga ko‘ra, Island Peak cho‘qqisiga chiqish Everest yo‘nalishidagi eng murakkab tayyorgarlik bosqichlaridan biri hisoblanadi.
Bu yo‘l jismoniy kuchlilik bilan birga yuqori darajadagi texnik ko‘nikmalarni talab qiladi. Ayniqsa, yo‘lning oxirgi qismi tik muz va qor qiyaliklari, xavfli muzliklar hamda 50–65 darajali yonbag‘irlarni o‘z ichiga oladi, bu esa alpinistlardan katta mahorat va ehtiyotkorlikni talab etadi.
Alyona Aitova cho‘qqiga maxsus o‘rnatilgan arqonlar yordamida jumar uskunasi orqali ko‘tarilgan. Tushish esa professional alpinistlar foydalanadigan “sakkizlik” qurilmasi yordamida amalga oshirilgan.
Shu sababli, Island Peak cho‘qqisiga chiqish oddiy sayohat emas, balki alohida texnik tayyorgarlik talab etadigan jiddiy sinov sifatida baholanadi. Aitovaning ushbu muvaffaqiyati o‘zbek ayollari sport tarixi uchun muhim voqea bo‘lib, yangi bosqichni boshlab berdi.
Bu yutuq nafaqat Alyona Aitovaning ishtiyoqi va mehnatining natijasi, balki o‘zbek ayollarining sport sohasidagi imkoniyatlarini dunyoga namoyish etuvchi yorqin dalil sifatida e’tirof qilinmoqda. Manba: zamin.uz.
