Energetika vazirligi Boysun tumanidagi "M-25" gaz konining 202-sonli qudug‘ida yuz bergan vaziyat bo‘yicha rasmiy izoh berdi. Bu haqda Zamin.uz xabar berdi.
Avvalroq ijtimoiy tarmoqlarda mazkur kon hududida gaz sizib chiqishi haqida xabarlar tarqalgan edi. Vazirlik ma’lumotiga ko‘ra, ushbu holat bir hafta avval sodir bo‘lgan.
O‘sha vaqtda geologik jarayonlar sababli maxsus yoqilgan gaz qisqa muddatga o‘chib qolgan. Mutaxassislarning ta’kidlashicha, bu kabi qisqa muddatli uzilishlar mahalliy geologik jarayonlarning o‘ziga xos xususiyatlari bilan bog‘liq.
Ammo gaz alangasi tezda qayta tiklangan va hozirgi kunda vaziyat to‘liq barqaror. Bugungi kunda "M-25" konidagi barcha ishlar mutaxassislar tomonidan nazorat qilinmoqda.
Hudud xavfsizligi va gaz qazib chiqarish jarayonlari belgilangan tartib-qoidalarga muvofiq olib borilayotgani ta’kidlangan.
