29-noyabr kuni Namangan viloyati Chust tumanida qattiq maishiy chiqindilarni qayta ishlash va ulardan elektr energiyasi ishlab chiqaradigan yangi zavodning tamal toshi qo‘yildi. Bu haqda Zamin.uz xabar berdi.
Ushbu loyiha Xitoyning ekologik sohada ixtisoslashgan China Everbright International kompaniyasi tomonidan amalga oshiriladi. Loyihaning umumiy qiymati 141,5 million AQSh dollariga teng bo‘lib, zavod kuniga 1,5 ming tonnagacha chiqindini qayta ishlash imkoniyatiga ega bo‘ladi.
Shuningdek, yiliga 227,5 million kilovatt-soat elektr energiyasi ishlab chiqarilishi ko‘zda tutilgan. Bu loyiha doirasida 150-200 ta yangi ish o‘rni yaratilishi rejalashtirilmoqda.
Zavodning to‘liq ishga tushirilishi 2027-yilga mo‘ljallangan. Ishlab chiqarilgan elektr energiya davlatga 30 yil davomida kafolatli shartnoma asosida sotiladi.
Bu loyiha O‘zbekistonda chiqindilarni termik qayta ishlash orqali energetik resurslar yaratishga qaratilgan dastur doirasida amalga oshirilmoqda. Bunday zavodlar nafaqat Namanganda, balki Andijon, Samarqand va Farg‘ona viloyatlarida ham qurilishi boshlangan.
Mazkur tashabbuslar ekologik muammolarni kamaytirish va energiya ishlab chiqarish hajmini oshirishga xizmat qiladi.
