2026-yil 1-yanvardan boshlab Namangan viloyatida yangi soliq boshqaruvi modeli tajriba tariqasida joriy etilishi rejalashtirilmoqda. Bu haqda Zamin.uz xabar berdi.
Bu haqda Adliya vazirligi ma’lum qildi. Ushbu yangi tizimga ko‘ra, fuqarolarning ko‘chmas mulkni ijaraga berish orqali oladigan daromadlaridan to‘lanadigan soliqlar to‘liq ravishda obyekt joylashgan hududning mahalliy byudjetiga yo‘naltiriladi.
Shuningdek, “Ochiq byudjet” portalida yangi xizmat — “Jismoniy shaxslar soliqlari hisobidan xarajatlar” nomli modul ishga tushiriladi. Bu modul orqali aholi o‘zlari to‘lagan soliqlar miqdorini kuzatishi va ushbu mablag‘larning qaysi byudjet xarajatlariga yo‘naltirilganini bilib borishi mumkin bo‘ladi.
Modulda daromad, mol-mulk va yer soliqlari haqidagi ma’lumotlar hamda ushbu mablag‘lar hisobidan moliyalashtirilgan loyihalar to‘g‘risida batafsil ma’lumot taqdim etiladi. Ushbu tizim mahalliy byudjetlarni oshkora boshqarish va fuqarolarning soliqlari qanday ishlatilayotganini ko‘rish imkonini beradi.
