Xususiy bandlik agentliklari uchun moliyaviy kafolat joriy etildi

O‘zbekiston Respublikasi Migratsiya agentligi ma’lumotiga ko‘ra, xususiy bandlik agentliklari faoliyati endilikda aniq moliyaviy kafolatlar asosida tartibga solinadi. Bu haqda Zamin.uz xabar berdi.

Bu yangilik fuqarolar huquq va manfaatlarini himoya qilish, xavfsizlikni ta’minlash va bandlik tizimida shaffoflikni kuchaytirish maqsadida joriy etildi. Yangi tartibga ko‘ra, har bir xususiy bandlik agentligi faoliyatini boshlashdan avval tijorat bankida maxsus depozit hisobvaraqqa BHMning 4 000 barobariga teng mablag‘ni joylashtirishi shart.

Ushbu mablag‘ agentlik faoliyatida qonunbuzarlik yoki o‘zboshimchalik sodir etilgan taqdirda fuqarolarni moddiy zarar ko‘rishdan himoya qilish uchun kafolat vazifasini o‘taydi. Migratsiya agentligi ta’kidlashicha, depozitdagi mablag‘ qat’iy nazorat ostida bo‘ladi va agentlikning roziligisiz ishlatilishi mumkin emas.

Agar mablag‘ ruxsatsiz sarflansa, belgilangan muddatda uni to‘liq qayta tiklash talabi qo‘yiladi. Mazkur mablag‘ bank, Migratsiya agentligi va xususiy bandlik agentligi o‘rtasidagi maxsus shartnoma asosida saqlanadi.

Bu esa har bir tomonning huquq va majburiyatlarini aniq belgilaydi. Agar xususiy bandlik agentligi qonunbuzarlikka yo‘l qo‘yib, fuqarolarga zarar yetkazsa, Migratsiya agentligi bankka asosli talabnoma yuboradi.

Bank esa depozitdan zarur summani yechib, Migratsiya jamg‘armasiga o‘tkazadi. Bu mexanizm fuqarolarning huquqlarini kafolatli himoya qilishga xizmat qiladi.

Mazkur tartibning asosiy maqsadi xususiy bandlik agentliklari faoliyatini qonuniy va mas’uliyatli qilish, xorijda ishlashni xohlagan fuqarolarni firibgarlikdan himoya qilish va sohada nazoratni kuchaytirishdir.