Xususiy bandlik agentliklari uchun yangi moliyaviy talablar.
O‘zbekiston Respublikasi Migratsiya agentligi ma’lumotiga ko‘ra, mamlakatda xususiy bandlik agentliklari faoliyati yangi, qat’iy moliyaviy kafolatlar asosida nazoratga olinadi. Bu haqda Zamin.uz xabar berdi.
Ushbu tartib fuqarolarning xavfsizligi, ularning huquq va manfaatlarini himoya qilish, shuningdek, bandlik tizimidagi shaffoflikni ta’minlashga qaratilgan. Yangi talablarga muvofiq, xususiy bandlik agentligi faoliyatini boshlashdan oldin tijorat bankida maxsus depozit hisobvaraqqa BHMning 4 000 barobariga teng mablag‘ni joylashtirishi shart.
Bu mablag‘ fuqarolarning moddiy manfaatlarini himoya qilish maqsadida zaxira sifatida saqlanadi. Agar agentlik qonunbuzarlikka yo‘l qo‘ysa yoki o‘z majburiyatlarini bajarmasa, ushbu mablag‘ fuqarolar zararini qoplash uchun ishlatiladi.
Depozit hisobvaraqdagi mablag‘ qat’iy nazorat ostida bo‘lib, agentlik uni Migratsiya agentligi roziligisiz sarflashi mumkin emas. Agar mablag‘ ruxsatsiz ishlatilgan bo‘lsa, belgilangan muddatda to‘liq tiklanishi talab qilinadi.
Ushbu mablag‘ bank, Migratsiya agentligi va xususiy bandlik agentligi o‘rtasida tuzilgan shartnoma asosida saqlanadi. Shartnoma tomonlarning huquq va majburiyatlarini aniq belgilab beradi.
Agar xususiy bandlik agentligi fuqarolar manfaatlariga zarar yetkazsa yoki qonun talablarini buzsa, Migratsiya agentligi bankka talabnoma taqdim etadi. Bank esa depozitdan zarur mablag‘ni yechib, Migratsiya jamg‘armasiga yo‘naltiradi.
Bu mexanizm fuqarolarni firibgarlik va noqonuniy harakatlardan himoya qilishni kafolatlaydi. Mazkur tartibning asosiy maqsadi xususiy bandlik agentliklari faoliyatini qonuniy va mas’uliyatli qilish, xorijda ishlash istagida bo‘lgan fuqarolarni himoya qilish va sohada nazoratni kuchaytirishdan iborat.
Manba: zamin.uz.
