Talabalar uchun qishki ko‘chirish jarayoni boshlanadi
O‘zbekiston davlat oliy ta’lim muassasalarida talabalar uchun qishki semestrda o‘qishni ko‘chirish jarayoni 20-dekabrdan boshlanadi. Bu haqda Zamin.uz xabar berdi.
Bu haqida “Davlat oliy ta’lim muassasalariga o‘qishga qabul qilish jarayonlarini tashkil etish to‘g‘risida”gi qarorda ma’lumot berilgan. Mazkur jarayon faqat uzrli sabablar asosida amalga oshiriladi va arizalar shaxsan, ya’ni oflayn tarzda qabul qilinadi.
Onlayn ariza topshirish imkoniyati mavjud emas. O‘qishni ko‘chirish uchun quyidagi sabablar asos bo‘lishi mumkin: birinchidan, talaba oila qurgan va turmush o‘rtog‘i doimiy yashaydigan hududdagi oliy ta’lim muassasasiga o‘qishini ko‘chirmoqchi bo‘lsa; ikkinchidan, davlat organi xodimi ish joyini o‘zgartirganda, uning turmush o‘rtog‘i yoki voyaga yetmagan farzandi o‘qishini ko‘chirishni xohlasa.
Ushbu holatda vazirlik yoki idora rahbarining tavsiya xati talab etiladi. Arizalar 20-dekabrdan 20-yanvargacha hududiy ishchi guruhlarga topshiriladi.
Talabalar yoki ularning yaqinlari quyidagi hujjatlarni taqdim etishi lozim: o‘qishni ko‘chirish bo‘yicha ariza, reyting daftarchasi yoki akademik ma’lumotnoma nusxasi, pasport nusxasi va uzrli sababni tasdiqlovchi hujjatlar. Qishki ko‘chirish jarayonini samarali tashkil qilish uchun oliy ta’lim muassasalarida maxsus ishchi guruhlar tuzilgan.
Ushbu guruhlar arizalarni ko‘rib chiqish va tegishli masalalarni hal qilish uchun mas’ul sanaladi. Manba: zamin.uz.
