Prezident Shavkat Mirziyoyev Jizzax viloyatiga tashrifi davomida Sharof Rashidov tumanidagi "Agromarkaz" qishloq xo‘jaligi majmuasida bo‘ldi. Bu haqda Zamin.uz xabar berdi.
Ushbu markaz qishloq xo‘jaligida yangi imkoniyatlarni yaratish, hosildorlikni oshirish va fermerlarga qulay xizmatlar ko‘rsatish maqsadida tashkil etilgan. "Agromarkaz"da qishloq xo‘jaligi uchun zarur barcha xizmatlar "yagona darcha" tamoyili asosida yo‘lga qo‘yilgan.
Markaz bir gektar hududni qamrab olgan bo‘lib, uning birinchi qavatida o‘simliklarni himoya qilish vositalari do‘koni, veterinariya dorixonasi, urug‘ va ko‘chatlar sotish, agromarket, mini-texnikalar bo‘limi hamda boshqa xizmatlar joylashgan. Ikkinchi qavatda esa o‘simliklarni himoya qilish laboratoriyasi, tuproq va suv tahlili xonasi, entomologiya va fitopatologiya bo‘limlari faoliyat ko‘rsatmoqda.
Shuningdek, markaz hududida viloyat qishloq xo‘jaligi boshqarmasi, Agrosanoatni rivojlantirish agentligi, agroinspeksiya va boshqa tashkilotlar joylashgan. Davlatimiz rahbari markaz faoliyati bilan yaqindan tanishib, uning xizmat turlarini ko‘paytirish, qishloq xo‘jaligida qo‘shilgan qiymat yaratish bo‘yicha muhim tavsiyalar berdi.
Shuningdek, mazkur markaz qishloq xo‘jaligi sohasida kompleks yondashuvni joriy etishda katta ahamiyat kasb etishini ta’kidladi. Manba: zamin.uz
