O‘zbekiston Prezidenti Administratsiyasi rahbari Saida Mirziyoyeva 2-dekabr kuni Toshkent shahrida ekologik vaziyatni yaxshilash bo‘yicha dolzarb masalalarni muhokama qilish uchun maxsus komissiya yig‘ilishini tashkil etdi. Bu haqda Zamin.uz xabar berdi.
Bu haqda komissiyaning Telegram kanali orqali ma’lumot berildi. Yig‘ilishda Ekologiya va iqlim o‘zgarishi milliy qo‘mitasi raisi Aziz Abduhakimov, Toshkent shahar hokimi Shavkat Umurzoqov, Toshkent viloyati hokimi Zoyir Mirzayev va boshqa mas’ul tashkilotlar vakillari ishtirok etdi.
Ular o‘z sohalariga oid hisobotlarni taqdim etib, mavjud muammolar va ularni bartaraf etish bo‘yicha takliflarini bildirdilar. Xabarga ko‘ra, havo ifloslanishi masalasi davlat rahbarining alohida e’tiborida bo‘lib, ushbu muammo bo‘yicha ilmiy tadqiqotlar olib borilmoqda.
Bu jarayonga mahalliy mutaxassislar bilan bir qatorda xorijiy ekspertlar ham jalb qilingan. Saida Mirziyoyeva komissiya a’zolariga aniq vazifalar belgilab berdi.
Unga ko‘ra, har bir chora-tadbirning ma’lum muddatda amalga oshirilishi va tizimli ishlar orqali kelgusi yilda havo ifloslanishining oldini olish zarurligi ta’kidlandi. Shuningdek, hukumat va mas’ul idoralardan yashil hududlarni kengaytirish, ariqlar tizimini tiklash, sanoat chiqindilarini kamaytirish va ekologik muhitni yaxshilash bo‘yicha qo‘shimcha choralar talab qilindi.
Saida Mirziyoyeva bu masalalarda sustkashlikka yo‘l qo‘yib bo‘lmasligini ta’kidladi va Toshkent shahri hamda viloyati hokimlaridan haftalik hisobotlar taqdim etishni talab qildi. Mazkur tashabbuslar mamlakatimiz ekologik xavfsizligini ta’minlashga, aholining sog‘lig‘ini himoya qilishga xizmat qiladi.
Xalqimizning farovon hayoti uchun bu kabi chora-tadbirlar muhim ahamiyat kasb etadi.
