Bugun, 4-dekabr kuni, Toshkent shahrining Sergeli va Yangihayot tumanlarining ayrim hududlarida texnik ta’mirlash ishlari olib borilishi sababli tabiiy gaz ta’minotida vaqtinchalik uzilishlar kuzatilishi mumkin. Bu haqda Zamin.uz xabar berdi.
"Hududgaz Poytaxt" gaz ta’minoti filiali xabariga ko‘ra, soat 10:00 dan 18:00 gacha gaz bosimining pasayishi yoki to‘xtashi ehtimoli mavjud. Sergeli tumanida “Nurhayot”, “Ittifoq”, “Nilufar”, “Daryo bo‘yi”, “Sofdil” va “So‘g‘diyona” mahalla fuqarolar yig‘inlari hududidagi 124 ta ko‘p qavatli uy va 833 ta xonadonda gaz bosimi pasayishi mumkin.
Shuningdek, “So‘g‘diyona” mahallasidagi 8 ta ko‘p qavatli uy va 860 ta xonadonda esa gaz ta’minoti to‘liq to‘xtashi ehtimoli bor. Yangihayot tumanida esa “Olchazor”, “Xushnud”, “Yorqin hayot”, “Chorbog‘” va “Viqor” mahallalaridagi 45 ta ko‘p qavatli uy va 899 ta xonadonda gaz bosimi pasayishi kutilmoqda.
Ta’mirlash ishlari yakunlangach, tabiiy gaz ta’minoti qayta tiklanadi va aholi uchun xizmat ko‘rsatish sifati yaxshilanadi. Qayd etilishicha, ayni paytda isitish mavsumining boshlanishi sabab gaz iste’moli bir necha barobar oshgan.
Shu bois gaz ta’minotidagi vaqtinchalik uzilishlar yuzaga kelmoqda. Mutasaddilar bu muammolarni tezda bartaraf etish uchun zarur choralarni ko‘rmoqda.
