O‘zgidromet markazi 8–11-dekabr kunlariga mo‘ljallangan ob-havo ma’lumotlarini e’lon qildi. Bu haqda Zamin.uz xabar berdi.
Unga ko‘ra, mamlakat hududlarida havo sharoiti o‘zgaruvchan bo‘lishi kutilmoqda. Ayrim hududlarda yomg‘ir yog‘ishi, shamol kuchayishi va tuman tushishi ehtimoli bor.
Qoraqalpog‘iston va Xorazm viloyatida yog‘ingarchilik kutilmaydi. Shamol sharqdan 7–12 m/s tezlikda esadi, 9–11-dekabr kunlari esa ba’zi joylarda shamol tezligi 20–22 m/s gacha kuchayishi mumkin.
Harorat kechalari 2–10 daraja sovuq, kunduzi esa 3–8 daraja iliq bo‘lishi taxmin qilinmoqda. Buxoro va Navoiy viloyatlarida 8–9-dekabr kunlari ba’zi joylarda yomg‘ir yog‘ishi mumkin.
Keyingi kunlarda havo ochilib, shamol kuchayishi mumkin. Kechalari harorat 0–10 daraja sovuq, kunduzi esa 3–13 daraja iliq bo‘lishi kutilmoqda.
Toshkent, Sirdaryo, Jizzax va Samarqand viloyatlarida 8–9-dekabr kunlari yomg‘ir yog‘ishi ehtimoli bor. 10–11-dekabr kunlari esa tuman kuzatilishi mumkin.
Kechalari harorat 0–7 daraja sovuq, kunduzi 3–10 daraja iliq bo‘ladi. Qashqadaryo va Surxondaryo viloyatlarida haftaning boshida yomg‘ir yog‘ishi mumkin.
Keyingi kunlarda havo barqarorlashib, kunduzgi harorat 12–17 daraja iliq atrofida bo‘lishi kutilmoqda. Andijon, Farg‘ona va Namangan viloyatlarida 8–9-dekabr kunlari yomg‘ir yog‘ishi mumkin.
10–11-dekabr kunlari esa havo quruq bo‘ladi. Kechalari harorat 0–5 daraja sovuq, kunduzi esa 3–11 daraja iliqni tashkil etadi.
Tog‘oldi va tog‘li hududlarda 8–10-dekabr kunlari yog‘ingarchilik, jumladan, yomg‘ir va qor yog‘ishi ehtimoli bor. Harorat kechalari 1–10 daraja sovuq, kunduzi esa 0–5 daraja iliq yoki 3 daraja sovuqqacha tushishi mumkin.
Manba: O‘zgidromet.
