Prezident Konstitutsiya kuni munosabati bilan tabrik yo‘lladi
O‘zbekiston Respublikasi Prezidenti Shavkat Mirziyoyev 8-dekabr – Konstitutsiya kuni munosabati bilan xalqni samimiy tabrikladi. Bu haqda Zamin.uz xabar berdi.
U o‘z tabrigida O‘zbekiston Konstitutsiyasining mamlakat hayotidagi o‘rni va ahamiyatini alohida ta’kidladi. Prezidentning so‘zlariga ko‘ra, Asosiy qonunimiz huquq va erkinliklarning kafolati, shuningdek, yurtimizda tinchlik, barqarorlik, birlik va hamjihatlikni ta’minlashda muhim manba bo‘lib xizmat qiladi.
Prezident Konstitutsiya asosida olib borilayotgan islohotlarni e’tirof etar ekan, Yangi O‘zbekistonni barpo etishda bu tamoyillar xalqimiz uchun kuch-g‘ayrat va ilhom manbai bo‘lib xizmat qilayotganini qayd etdi. Xalq hokimiyatchiligi va vakillik demokratiyasi tamoyillari asosida milliy parlament va mahalliy kengashlar faoliyati izchil rivojlanayotgani ta’kidlandi.
Jumladan, mahalliy kengashlar tomonidan 25 mingdan ortiq masala muhokama qilinib, tegishli qarorlar qabul qilingani va deputatlik so‘rovlari yuborilgani bu yo‘nalishdagi ishlarning samaradorligini ko‘rsatmoqda. Shavkat Mirziyoyev 2026-yildan boshlab tuman va shahar hokimlari hamda kengash raislari vazifalarini ajratish bo‘yicha chora-tadbirlar amalga oshirilishini ma’lum qildi.
Bu islohotlar vakillik organlarini xalq minbariga aylantirishga xizmat qilishi ta’kidlandi. Prezidentning ta’kidlashicha, bu yildagi ijtimoiy va iqtisodiy yutuqlar ham aholining farovonligini oshirishga qaratilgan keng ko‘lamli islohotlarning natijasidir.
Joriy yilda aholi jon boshiga daromad 3 500 dollarni tashkil etdi, maktabgacha ta’limda qamrov 78 foizga, oliy ta’limda esa 42 foizga yetdi. Odamlarning o‘rtacha umr ko‘rish darajasi 75 yoshdan oshdi.
Shuningdek, 1 milliondan ortiq fuqaro kambag‘allikdan chiqarilib, kambag‘allik darajasi 6,6 foizga tushirildi. Prezident xalqaro reytinglarda erishilgan yutuqlarni ham alohida tilga oldi.
Xususan, O‘zbekiston Barqaror rivojlanish maqsadlari indeksida 19 pog‘onaga ko‘tarildi va mintaqadagi eng jadal rivojlanayotgan davlat sifatida qayd etildi. YUNESKOning Bosh konferensiyasining Samarqandda o‘tkazilgani esa xalqaro e’tirofga sazovor bo‘ldi.
Prezident tabrigida xalqimizga sihat-salomatlik, baxt, omad va farovonlik tilandi.
