Sirdaryoda ta’mir: ayrim hududlarda elektr uziladi

O‘zbekiston Energetika vazirligining xabariga ko‘ra, Sirdaryo issiqlik elektr stansiyasida gaz turbinasi rotori yangisiga almashtirilmoqda. Bu haqda Zamin.uz xabar berdi.

Ushbu yirik hajmdagi texnik ishlar sabab stansiyaning bir qismi kamida bir oy davomida ta’mirlanadi. Natijada, elektr energiyasi ishlab chiqarish quvvatiga ma’lum darajada ta’sir ko‘rsatmoqda.

Bundan tashqari, qish mavsumida kunlarning qisqarishi tufayli quyosh elektrostansiyalarining ishlab chiqarish hajmi kamaygan. Bu esa elektr tarmoqlaridagi yuklamaning oshishiga olib kelmoqda.

Shu sababli, hukumat va mas’ul tashkilotlar iste’mol va ishlab chiqarish o‘rtasidagi muvozanatni saqlash maqsadida ayrim hududlarda 17:00 dan 21:00 gacha qisqa muddatli elektr uzilishlari bo‘lishi mumkinligini ma’lum qilmoqda. Mutasaddilar aholiga elektr energiyasidan tejamkorlik bilan foydalanishni, maxsus e’lonlarni kuzatib borishni va uzilishlar yuz berganda xavotirga tushmaslikni tavsiya etmoqda.

Bu chora-tadbirlar elektr ta’minotining barqarorligini ta’minlashga qaratilgan. Ma’lumot manbasi: One.uz