O‘zbekistonda to‘lovlar bosqichma-bosqich naqdsiz shaklga o‘tadi
O‘zbekistonda moliyaviy tizimni tartibga solish, yashirin iqtisodiyot ulushini kamaytirish va zamonaviy to‘lov texnologiyalarini rivojlantirish bo‘yicha muhim qadamlar qo‘yilmoqda. Bu haqda Zamin.uz xabar berdi.
2026 yil 1 apreldan boshlab ayrim to‘lovlar faqat naqdsiz shaklda amalga oshirilishi belgilandi. Bu haqda 10 dekabr kuni prezident farmoni qabul qilindi va Adliya vazirligi tomonidan rasman e’lon qilindi.
Yangi tartibga ko‘ra, davlat idoralari xizmatlari, elektr energiyasi, gaz va ichimlik suvi uchun to‘lovlar, alkogol va tamaki mahsulotlari savdosi, yoqilg‘i va elektr quvvati xaridi, qiymati 25 million so‘mdan yuqori bo‘lgan tovar va xizmatlar, shuningdek, ko‘chmas mulk yoki ishlab chiqarilganiga 10 yildan oshmagan avtomobillar savdosi faqat elektron to‘lovlar orqali amalga oshiriladi. Ushbu chora-tadbirlar iqtisodiyotda shaffoflikni oshirish, qalloblik xavfini kamaytirish hamda zamonaviy to‘lov usullarini keng joriy etishga qaratilgan.
Farmonga ko‘ra, 2030 yilgacha yashirin iqtisodiyot ulushini YAIMga nisbatan 1,3 barobarga qisqartirish va savdo hamda xizmat ko‘rsatish sohalarida naqdsiz to‘lovlar ulushini 75 foizga yetkazish maqsad qilingan. Bu esa iqtisodiy barqarorlikni ta’minlashga xizmat qiladi.
2026 yil 1 yanvarga qadar barcha yuridik shaxslar elektron to‘lovlarni qabul qilish uchun yagona QR kodga ega bo‘lishi shart. 1 iyuldan boshlab esa QR koddan foydalanish majburiy talabga aylanadi.
QR koddan foydalanmaslik savdo qoidalarining buzilishi sifatida baholanadi. Bu talab to‘lov jarayonlarini soddalashtirish va iste’molchilar huquqlarini himoya qilishga qaratilgan.
Shuningdek, 2026 yil 1 yanvardan import tovarlar uchun ekologik va muvofiqlik sertifikati bir yil muddatga beriladi. 1 martdan boshlab esa soliq organlari xodimlari hamda Navoiy va Chirchiq shaharlarida yashovchi jismoniy shaxslar uchun yillik daromad deklaratsiyasini topshirish tajriba-sinov tariqasida yo‘lga qo‘yiladi.
Ushbu o‘zgarishlar soliq nazoratini kuchaytirish va tartibni yanada takomillashtirishga xizmat qiladi.
