Qozog‘istonning «QazaqGaz» davlat kompaniyasi va O‘zbekistonning «O‘ztransgaz» korxonasi o‘z hududi orqali gaz tranzitini amalga oshirish bo‘yicha rasmiy shartnoma imzoladi. Bu haqda Zamin.uz xabar berdi.
Bu haqda «QazaqGaz» matbuot xizmati xabar berdi. Mazkur kelishuv ikki davlat o‘rtasidagi energetik hamkorlikni yangi bosqichga olib chiqishi ta’kidlanmoqda.
Shartnomani O‘zbekiston tomonidan «O‘ztransgaz» boshqaruv raisi vazifasini bajaruvchi Asqar Isoqov, Qozog‘iston tomonidan esa «QazaqGaz» boshqaruv raisi Alibek Jamauov imzolagan. Tomonlar ushbu bitim gaz yetkazib berish zanjiridagi barqarorlikni ta’minlashga xizmat qilishini qayd etishdi.
Rasmiy bayonotda aytilishicha, shartnomaning imzolanishi gaz tashish bo‘yicha avvalgi kelishuvlarni mustahkamlaydi va gaz transporti sohasidagi o‘zaro hamkorlikni yanada chuqurlashtiradi. Bu esa mintaqaviy energetika infratuzilmasining ishonchliligini oshirishga xizmat qiladi.
Ayniqsa, kuz-qish mavsumida gaz ta’minotini barqaror saqlashda mazkur kelishuvning ahamiyati katta ekani ta’kidlandi. Qozog‘iston Energetika vaziri Yerlan Akkenjenov shartnoma Rossiya gazining tranzitiga oid ekanini ma’lum qildi.
Uning so‘zlariga ko‘ra, ushbu kelishuv hozirgi hajmlarni saqlab qolish bilan birga, kelajakda tranzit imkoniyatlarini kengaytirishni ham nazarda tutadi. Vazirning aytishicha, tranzit hajmini yiliga 8,4 milliard kub metrgacha oshirish imkoniyati ko‘rib chiqilmoqda.
Mutaxassislar fikricha, mazkur kelishuv O‘zbekiston va Qozog‘iston o‘rtasidagi strategik energetik hamkorlikni mustahkamlash bilan birga, Markaziy Osiyo mintaqasida gaz ta’minoti barqarorligiga ham ijobiy ta’sir ko‘rsatadi. Bu orqali tranzit yo‘laklarining samaradorligi oshib, mavsumiy xavflar kamayadi.
