Toshkentda transport tizimi yangilanadi: yangi rejalar e’lon qilindi
Toshkent shahrida transport tizimini yaxshilash va tirbandlikni kamaytirish maqsadida muhim yangiliklar e’lon qilindi. Bu haqda Zamin.uz xabar berdi.
Prezident Shavkat Mirziyoyev 16-dekabr kuni o‘tkazgan yig‘ilishda poytaxtga tashrif buyuruvchi haydovchilar o‘z avtomobillarini shahar tashqarisida maxsus avtoturargohlarda qoldirib, shaharga jamoat transportida kirishi mumkin bo‘lishini ta’kidladi. Dekabr oyida imzolangan qarorga ko‘ra, Toshkentda transport boshqaruvi yangi bosqichga o‘tadi.
Shaharda yagona intellektual boshqaruv markazi tashkil etilib, u sun’iy intellekt yordamida harakat oqimini tahlil qiladi. Ushbu tizim tirbandliklarni oldindan aniqlash va yo‘l-transport hodisalarining oldini olishga xizmat qiladi.
Kelgusi yilda poytaxtga kirishdagi ikki tekshiruv posti shahar tashqarisiga ko‘chiriladi, yana uchta posti rekonstruksiya qilinadi. Ushbu hududlarda 3,5 ming yuk mashinasi va 5,5 ming yengil avtomobil uchun avtoturargohlar quriladi.
Shuningdek, haydovchilar va yo‘lovchilar uchun kempinglar tashkil etilib, qulay sharoitlar yaratiladi. Ushbu nuqtalar jamoat transporti tarmog‘i bilan bog‘lanadi.
Natijada, mehmonlar o‘z transport vositalarini tashqarida qoldirib, shaharga tez, xavfsiz va arzon jamoat transportida kirish imkoniyatiga ega bo‘ladi. Shahar hokimligi kelgusi yilda yo‘l harakati sifatini yaxshilash ustida ham ishlaydi.
Xususan, 100 ta aqlli svetoforli chorrahalar joriy etiladi, 30 mingta avtomobil to‘xtash joyi xususiy sektor bilan hamkorlikda quriladi, 300 ta bekat qayta ta’mirlanadi, 40 km piyoda yo‘laklari va 20 km veloyo‘laklar barpo etiladi. Bundan tashqari, 100 km yo‘l ta’mirlanadi, Yunusobod va Yashnobod tumanlarida yo‘l o‘tkazgich va tunnel quriladi, shuningdek, 200 ta elektrobus xarid qilinadi.
Bu chora-tadbirlar poytaxtdagi transport infratuzilmasini zamonaviylashtirish va aholiga qulaylik yaratishga qaratilgan. Mazkur yangiliklar shahar hayotini sezilarli darajada yaxshilashi kutilmoqda.
Manba: Zamin.uz
