Shavkat Mirziyoyev "Yunusobod galereyasi"ga tashrif buyurdi
Prezident Shavkat Mirziyoyev Toshkent shahrining Yunusobod tumanida joylashgan “Yunusobod galereyasi” savdo, xizmat ko‘rsatish va biznes markaziga tashrif buyurdi. Bu haqda Zamin.uz xabar berdi.
Ushbu majmua ikki yarim gektar maydonda qurilgan bo‘lib, zamonaviy savdo va tijorat infratuzilmasini o‘zida mujassam etgan. Markazda umumiy hisobda 53 ming kvadrat metrdan ortiq savdo va tijorat maydonlari mavjud.
Mazkur loyiha uchun 14 million dollarlik xorijiy investitsiya jalb qilingan. Majmuada bir qator mashhur xorijiy brendlar faoliyatini yo‘lga qo‘ygan.
Bugungi kunda markazda 100 dan ortiq savdo nuqtalari ish boshlagan bo‘lib, bu orqali 500 ga yaqin yangi ish o‘rni yaratilgan. Hisob-kitoblarga ko‘ra, mazkur savdo markaziga yiliga 2,5 million nafargacha tashrif buyuruvchi kelishi kutilmoqda.
Loyihaning umumiy qiymati 43 million dollarni tashkil etadi. Majmuaning arxitektura va dizayn yechimi ham alohida e’tiborga sazovor.
U joriy yilda MDH davlatlari o‘rtasida o‘tkazilgan xalqaro me’morchilik tanlovida birinchi o‘rinni qo‘lga kiritgan. Bu kabi yirik loyihalar mamlakat iqtisodiyotini rivojlantirishda muhim ahamiyat kasb etadi.
