Toshkentda tirbandlikni kamaytirish uchun yangi rejalar e’lon qilindi

Toshkent shahrida transport tizimini takomillashtirish va tirbandlikni kamaytirish maqsadida yangi rejalar e’lon qilindi. Bu haqda Zamin.uz xabar berdi.

Prezident Shavkat Mirziyoyev 16-dekabr kuni o‘tkazgan yig‘ilishda poytaxtga tashrif buyuruvchi haydovchilar o‘z avtomobillarini shahar tashqarisida tashkil etiladigan yirik avtoturargohlarda qoldirib, markazga jamoat transportida kirishlari mumkin bo‘lishini ta’kidladi. Dekabr oyi boshida imzolangan maxsus qarorga ko‘ra, Toshkentda transport boshqaruvi yangi bosqichga ko‘tariladi.

Shaharda yagona intellektual boshqaruv markazi tashkil etiladi. U harakat oqimini sun’iy intellekt yordamida tahlil qilib, tirbandliklarni oldindan aniqlash va yo‘l-transport hodisalarining oldini olishga xizmat qiladi.

2024-yilda poytaxtga kirishdagi ikkita tekshiruv posti shahar tashqarisiga ko‘chiriladi, yana uchta post rekonstruksiya qilinadi. Ushbu joylarda 3,5 ming yuk avtomobili va 5,5 ming yengil mashina uchun avtoturargohlar quriladi.

Shuningdek, haydovchilar va yo‘lovchilar uchun qulay kempinglar tashkil etiladi. Eng muhimi, bu nuqtalar jamoat transporti tarmog‘i bilan bog‘lanadi.

Shunday qilib, mehmonlar o‘z avtomobillarini tashqarida qoldirib, shaharga tez, xavfsiz va qulay jamoat transporti orqali kirishlari mumkin. Shahar hokimligiga transport tizimini rivojlantirish bo‘yicha muhim vazifalar yuklatilgan.

Jumladan, 100 ta “aqlli” svetoforli chorrahalarni joriy etish, 30 mingta avtomobil to‘xtash joyini xususiy sektor bilan hamkorlikda tashkil etish, 300 ta bekatni qayta qurish, 40 kilometr piyoda yo‘laklari va 20 kilometr veloyo‘laklarni barpo etish, 100 kilometr yo‘lni ta’mirlash, shuningdek, Yunusobod va Yashnobodda yo‘l o‘tkazgich va tunnel qurish rejalashtirilgan. Bundan tashqari, 200 ta elektrobus xarid qilish vazifasi ham belgilangan.

Mazkur chora-tadbirlar Toshkent shahrida transport harakatini sezilarli darajada yaxshilash hamda aholiga qulaylik yaratishga qaratilgan. Manba: zamin.uz