O‘zbekiston Respublikasi Prezidenti Shavkat Mirziyoyev Yaponiya Liberal-demokratik partiyasi vitse-prezidenti, Yaponiya parlamentidagi O‘zbekiston bilan do‘stlik ligasi hamda Markaziy Osiyo mamlakatlari bilan do‘stlik ligasi raisi Taro Aso bilan uchrashuv o‘tkazdi. Bu haqda Zamin.uz xabar berdi.
Mazkur uchrashuvda ikki davlat o‘rtasidagi strategik hamkorlikni, jumladan parlamentlararo aloqalarni yanada rivojlantirish masalalari muhokama qilindi. Tadbirda do‘stlik ligasi a’zolari ham ishtirok etdi.
Uchrashuv davomida tomonlar O‘zbekiston va Yaponiya o‘rtasidagi ko‘p qirrali hamkorlikni rivojlantirishda parlamentlarning o‘rni muhim ekanini ta’kidladi. Shuningdek, parlamentlararo muloqotni muntazam davom ettirish va do‘stlik guruhlarining rolini yanada kuchaytirish masalalariga alohida e’tibor qaratildi.
Taro Asoning O‘zbekiston va Yaponiya o‘rtasidagi hamkorlikni mustahkamlashga qo‘shgan hissasi yuksak baholandi. Uchrashuv yakunida 2026-yilda navbatdagi Parlamentlararo forumni O‘zbekistonda tashkil etish bo‘yicha kelishuvga erishildi.
Ma’lumot uchun, O‘zbekiston bilan do‘stlik ligasi 2002-yilda tashkil etilgan bo‘lib, hozirda uning tarkibida 40 nafardan ortiq a’zo bor. Ular orasida Yaponiyaning taniqli siyosiy arboblari, nufuzli deputatlar va diplomatlar mavjud.
