O‘zbekistonda zilzila sezildi, zarar haqida ma’lumot yo‘q
19-dekabr kuni soat 10:39 da Afg‘onistonning Taxor viloyati hududida 6 ball kuchiga ega zilzila qayd etildi. Bu haqda Zamin.uz xabar berdi.
Ushbu yer silkinishining epitsentri Toshkentdan taxminan 551 kilometr janubiy-sharqda joylashgan. O‘zbekiston Seysmoprognostik monitoring markazi ma’lumotlariga ko‘ra, zilzila mamlakatning bir qancha hududlarida sezilgan.
Surxandaryo viloyatida zilzila eng kuchli bo‘lib, yer tebranishlari 4 ballni tashkil etdi. Qashqadaryo va Samarqand viloyatlarida esa yer silkinishi 3 ball atrofida bo‘ldi.
Jizzax, Sirdaryo va Farg‘ona viloyatlarida 2–3 ball darajasidagi silkinishlar qayd etilgan. Navoiy viloyati, Toshkent shahri, shuningdek, Namangan va Andijon viloyatlarida esa zilzila 2 ball kuchida sezildi.
Hozircha fuqarolar hayoti yoki infratuzilmaga jiddiy zarar yetgani haqida rasmiy ma’lumot berilmadi. Tegishli vazirlik va xizmatlar vaziyatni nazorat ostida ushlab turibdi.
Mutaxassislar aholini xotirjam bo‘lishga, xavfsizlik qoidalariga rioya qilishga va ehtiyot choralarini ko‘rishga chaqirmoqda. Yer silkinishlari xavfi hali ham mavjud bo‘lib, vaziyat doimiy kuzatuv ostida.
Ma’lumot manbasi: One.uz.
