O‘zbekiston Respublikasi Prezidenti Shavkat Mirziyoyev Tokiodagi rasmiy tashrifi davomida Yaponiya xalqaro hamkorlik banki (JBIC) boshqaruvchisi Nobumitsu Xayasi bilan uchrashdi. Bu haqda Zamin.uz xabar berdi.
Ushbu uchrashuvda bank bilan strategik sheriklikni yanada rivojlantirish masalalari muhokama qilindi. Muloqot davomida JBIC bilan hamkorlikning ijobiy natijalari qayd etildi.
Xususan, bankning O‘zbekiston bilan loyihalar portfeli 5 milliard dollardan oshib, neft-kimyo, energetika, telekommunikatsiyalar, infratuzilma, yengil sanoat va boshqa sohalarni qamrab olgani ta’kidlandi. Shu bilan birga, energetika, transport, axborot texnologiyalari infratuzilmasini rivojlantirish, sog‘liqni saqlash tizimini modernizatsiya qilish kabi ustuvor yo‘nalishlarda umumiy qiymati 10 milliard dollardan ortiq yangi loyihalarni ishlab chiqish va amalga oshirish masalalariga alohida e’tibor qaratildi.
Shuningdek, amalga oshirilayotgan loyihalarning samaradorligini oshirish zarurligi ta’kidlandi. Muzokaralarda ijtimoiy sohalarda davlat-xususiy sheriklik loyihalarini qo‘llab-quvvatlash hamda xususiy sektorni rivojlantirishga qaratilgan investitsiyalarni kengaytirish masalalari ham muhim ahamiyat kasb etdi.
JBIC boshqaruvchisi Nobumitsu Xayasi O‘zbekiston bilan hamkorlik natijalarini yuqori baholab, Yangi O‘zbekistonda amalga oshirilayotgan islohotlarni qo‘llab-quvvatlashga tayyor ekanini bildirdi. Manba: zamin.uz
