Davlat xavfsizlik xizmati va Bojxona qo‘mitasi xodimlari hamkorligida Andijon viloyatining Xo‘jaobod tumanida maxsus tezkor tadbir o‘tkazildi. Bu haqda Zamin.uz xabar berdi.
Tadbir davomida “Do‘stlik” chegara bojxona posti yaqinida Farg‘ona viloyatida yashovchi, 1994 yilda tug‘ilgan fuqaro T.T. to‘xtatilib, uning yonidagi xo‘jalik qopi xolislar ishtirokida tekshirildi.
Tekshiruv davomida qop ichida bo‘lgan uch dona temir qoplamali avtomobil ehtiyot qismlari bo‘laklarga ajratilganda, ularning ichiga yashirilgan jami 7 kilogramm 784 gramm oltin bo‘laklari topilgani aniqlandi. Mutaxassislar tomonidan berilgan baholash xulosasiga ko‘ra, ushbu oltinlarning umumiy qiymati 12 milliard 465 million 795 ming so‘mni tashkil etadi.
O‘tkazilgan surishtiruv natijasida ma’lum bo‘lishicha, T.T. bu oltinlarni Toshkent shahridan olib, Qirg‘izistonda qabul qiluvchi shaxsga bojxona nazoratidan yashirincha yetkazib berishni rejalashtirgan.
Hozirda mazkur holat yuzasidan tegishli huquqiy chora-tadbirlar amalga oshirilmoqda. Tergov harakatlari davom etmoqda.
Ma’lumot manbasi: zamin.uz.
