Prezident Yaponiyada yirik investitsion kelishuvlarga erishdi
O‘zbekiston Respublikasi Prezidenti Shavkat Mirziyoyev Yaponiyaga rasmiy tashrifi davomida bir qator yirik kompaniyalar rahbarlari bilan uchrashuvlar o‘tkazdi. Bu haqda Zamin.uz xabar berdi.
Tashrifning ishbilarmonlik qismi Tokio shahrida bo‘lib o‘tdi. Prezident Shavkat Mirziyoyev Yaponiya xalqaro hamkorlik agentligi (JICA) prezidenti Akixiko Tanaka bilan uchrashdi.
Muloqotda JICA bilan iqtisodiy zonalarni rivojlantirish, qishloq xo‘jaligi, tibbiy asbob-uskunalar yetkazib berish va tadbirkorlikni qo‘llab-quvvatlash bo‘yicha yangi kelishuvlar imzolandi. Shuningdek, Yaponiyaning investorlari uchun maxsus iqtisodiy zona tashkil etish masalasi ko‘rib chiqildi.
Prezident JICA bilan 2030-yilgacha yangi hamkorlik dasturi doirasida loyihalarni o‘z vaqtida amalga oshirish zarurligini ta’kidladi. Davlatimiz rahbari “Sojitz Corporation” kompaniyasi rahbarlari Masayoshi Fudzimoto va Kosuke Uemura bilan uchrashuv o‘tkazdi.
Sirdaryo viloyatida bug‘-gaz elektr stansiyasini qurish loyihasini jadallashtirish, Toshkentda yangi xalqaro aeroport va shamol elektr stansiyasini qurish kabi masalalar muhokama qilindi. Bundan tashqari, maktabgacha ta’lim muassasalarini modernizatsiya qilish va yashil energiya loyihalariga alohida e’tibor qaratildi.
Shavkat Mirziyoyev “JOGMEC” va “ITOCHU” kompaniyalari rahbarlari bilan ham uchrashdi. Yaponiyaning ilg‘or texnologiyalarini qo‘llash orqali qo‘shma loyihalarni amalga oshirish masalalari ko‘rib chiqildi.
Navoiy va Qashqadaryo viloyatlarida uran konlarini o‘zlashtirish, qimmatbaho metallarni qazib olish hamda suvni tozalash va avtomobilsozlik sohalarida hamkorlik qilish bo‘yicha kelishuvlarga erishildi. Prezident, shuningdek, “Sumitomo Corporation” kompaniyasi prezidenti Shingo Ueno bilan uchrashdi.
Energetika va sanoat sohalarida qo‘shma loyihalarni amalga oshirish, jumladan, Samarqandda quyosh elektr stansiyalari qurilishi loyihalari muhokama qilindi. Qoraqalpog‘istonda shamol elektr stansiyalari qurish rejalari ham e’tirof etildi.
Kompaniyaning yuqori kuchlanishli kabel ishlab chiqarish va tez tibbiy yordam mashinalarini modernizatsiya qilishda ishtirok etishi ko‘zda tutildi. Uchrashuvlar davomida 2030-yilgacha mo‘ljallangan hamkorlik dasturlari ishlab chiqish va ularni muvaffaqiyatli amalga oshirish masalalari muhim ahamiyat kasb etdi.
(Manba: zamin.uz)
