Bir yil davomida soxta haydovchilik guvohnomalarini tayyorlash va rasmiylashtirish bilan shug‘ullangan jinoiy guruh fosh etildi. Bu haqda Zamin.uz xabar berdi.
Tergov jarayonida aniqlanishicha, guruh faoliyatida Davlat xizmatlari markazining bir nafar xodimi ham ishtirok etgan. Ushbu shaxslar jami 72 nafar fuqaro uchun qalbaki hujjatlar tayyorlab berib, buning evaziga 616 million so‘m miqdorida noqonuniy daromad olgan.
Jinoiy guruh guvohnomalarni ikki xil usulda tayyorlagan. Birinchi usulda, 500–1000 AQSh dollari evaziga eski turdagi haydovchilik guvohnomalari qo‘lbola usulda tayyorlanib, pora evaziga yangi namunadagi guvohnomalarga almashtirilgan.
Ikkinchi usulda esa, 10 ming AQSh dollarigacha bo‘lgan mablag‘ evaziga Yo‘l harakati xavfsizligi bo‘limlari nomidan soxta ma’lumotnomalar va QR-kodlar tayyorlangan. Tayyorlangan qalbaki hujjatlar tuman Davlat xizmatlari markazlariga taqdim etilib, ayrim mansabdor shaxslar yordamida qonunga zid ravishda rasmiylashtirilgan.
Bosh prokuratura tomonidan o‘tkazilgan qo‘shimcha tekshiruvlar natijasida yana 1 200 dan ortiq qalbaki haydovchilik guvohnomalari aniqlangan. Hozirda noqonuniy yo‘l bilan qo‘lga kiritilgan barcha guvohnomalar belgilangan tartibda bekor qilindi.
Qonunbuzarlikda ishtirok etgan shaxslar, shuningdek, qalbaki hujjatlarni bilib turib sotib olgan fuqarolarga nisbatan jinoiy javobgarlik masalasi ko‘rib chiqilmoqda. Ma’lumot manbasi: One.uz.
