19-dekabr kuni ob-havo sovuq va tumanli bo‘ladi
O‘zgidromet 19-dekabr kuni kuzatiladigan ob-havo ma’lumotlarini e’lon qildi. Bu haqda Zamin.uz xabar berdi.
Unga ko‘ra, Toshkent shahrida havo o‘zgaruvchan bo‘lib, kechasi va ertalab yengil qor yog‘ishi, ayrim hududlarda tuman tushishi mumkin. Kunduzi yog‘ingarchilik bo‘lmaydi.
Harorat kechasi 0–2 daraja sovuq, kunduzi esa 1–3 daraja iliq bo‘lishi kutilmoqda. Qoraqalpog‘iston va Xorazm hududlarida yog‘ingarchilik kuzatilmaydi, lekin ayrim joylarda tuman tushishi ehtimoli bor.
Kechasi havo ancha sovib, harorat 15–18 daraja sovuqqacha pasayishi mumkin. Buxoro va Navoiy viloyatlarida ham yog‘ingarchilik kutilmayapti, biroq tuman ehtimoli mavjud.
Toshkent, Sirdaryo, Samarqand va Jizzax viloyatlarida kechasi va ertalab ayrim joylarda biroz qor yog‘ishi mumkin. Kunduzi esa ob-havo asosan quruq bo‘ladi.
Qashqadaryo va Surxondaryo viloyatlarida esa kechga tomon yomg‘ir yog‘ib, ayrim hududlarda bu yog‘ingarchilik qorga aylanishi mumkin. Farg‘ona vodiysi viloyatlarida kechasi va ertalab yomg‘ir va qor aralash yog‘ingarchilik kuzatiladi.
Tog‘li hududlarda esa vaqti-vaqti bilan qor yog‘ishi, tuman tushishi, yaxmalaklar va qor ko‘chishi xavfi mavjud. Mutaxassislar yo‘llarda ehtiyot bo‘lishni va xavfsizlik choralariga rioya qilishni tavsiya etmoqda.
Ma’lumot manbasi: O‘zgidromet.
