Mirziyoyev: Markaziy Osiyo-Yaponiya hamkorligi kengayadi
O‘zbekiston Prezidenti Shavkat Mirziyoyev 20-dekabr kuni Tokioda o‘tkazilgan «Markaziy Osiyo + Yaponiya» muloqotining birinchi sammitida ishtirok etdi. Bu haqda Zamin.uz xabar berdi.
Ushbu sammitda Prezident Markaziy Osiyo va Yaponiya davlatlari o‘rtasidagi hamkorlikni kengaytirishga qaratilgan bir qator tashabbuslar bilan chiqdi. Jumladan, u davlat rahbarlari darajasidagi uchrashuvlarni har ikki yilda bir marta o‘tkazishni taklif qildi va kelgusi sammitlardan birini O‘zbekistonda tashkil etishga tayyorligini bildirdi.
Shavkat Mirziyoyev «Markaziy Osiyo – Yaponiya 2040» strategiyasini ishlab chiqishni taklif qildi. Ushbu strategiya uzoq muddatli hamkorlikning asosiy yo‘nalishlarini belgilab berishi, mintaqada iqtisodiy va barqaror rivojlanishga hissa qo‘shuvchi aniq loyihalarni o‘z ichiga olishi kerakligi ta’kidlandi.
Bundan tashqari, mintaqa infratuzilmasi va sanoatini rivojlantirish uchun investitsiya jamg‘armasi tashkil etish hamda yapon texnoparklari tarmog‘ini shakllantirish taklif etildi. Prezident raqamli rivojlanishga ham alohida e’tibor qaratdi.
U sun’iy intellekt, narsalar interneti va kiberxavfsizlik sohalaridagi loyihalarni birlashtiruvchi «Markaziy Osiyo – Yaponiya» raqamli markazini tashkil etishni taklif qildi. Shuningdek, «yashil» energetika, ekologiya, transport va seysmik xavfsizlik yo‘nalishlarida hamkorlikni mustahkamlash zarurligini ta’kidladi.
Gumanitar sohada esa ta’limni rivojlantirish, yoshlar uchun maxsus dasturlarni ishga tushirish va madaniy almashinuvlarni kengaytirish bo‘yicha tashabbuslar ilgari surildi. Sammit yakunida ishtirokchilar Tokio deklaratsiyasini qabul qildilar.
Bu hujjat tomonlar o‘rtasidagi hamkorlikning yangi bosqichini belgilab berdi. Manba: one.uz.
